Sterling segist saklaus

Raheem Sterling, vængmaður enska úrvalsdeildarliðsins Liverpool, lýsti yfir sakleysi sínu í dag þegar mál hans var tekið fyrir í réttarsal í Liverpool.

Hinn átján ára gamli Raheem Sterling eyddi nótt í fangelsi eftir að hann var handtekinn fyrir líkamsárás á fimmtudagskvöldið.

Sterling var með kærustu sinni Shönu Halliday þegar hann var handtekinn klukkan hálf ellefu og í framhaldinu var þessi stórefnilegi leikmaður ákærður fyrir líkamsárás.

Réttarhald Raheem Sterling verður í septembermánuði og það mun örugglega fara mikið fyrir því í enskum fjölmiðlum.

Raheem Sterling hefur þrátt fyrir ungan aldur verið duglegur að komast í fyrirsagnir ensku blaðanna bæði fyrir snilli sína á vellinum en einnig fyrir vandræði sín utan vallar.