Manchester United tapaði leiknum hans Rio

Manchester United tapaði 1-3 á móti Sevilla í góðgerðaleik Rio Ferdinand sem fram fór á Old Trafford í kvöld. Þetta var fyrsti leikur liðsins á Old Trafford undir stjórn David Moyes.

Vitolo og Marko Marin komu Sevilla í 2-0 með mörkum með aðeins fjögurra mínútna millibili í fyrri hálfleiknum en Antonio Valencia minnkaði muninn á 64. mínútu. Bryan Rabello innsiglaði síðan 3-1 sigur spænska liðsins í uppbótartíma.

Adnan Januzaj, 18 ára Belgi, vakti athygli í þessum fyrsta leik sínum í byrjunarliðinu hjá Manchester United. Hann var í framlínunni með Sílemanninum Angelo Henriquez.

Adnan Januzaj lagði meðal annars upp mark Antonio Valencia og átti heilt yfir flottan leik. Stuðningmenn United höfðu þá yfir einhverju að gleðjast á leiðinni heim af vellinum því ekki voru úrslitin til að hrópa húrra fyrir.

Manchester United hvíldi lykilmenn sína í leiknum í kvöld en spilar liðið við Wigan á Wembley á sunnudaginn þar sem Englandsmeistararnir og bikarmeistararnir keppa um Samfélagsskjöldinn.