Leikmenn skiluðu sér til baka í skynsamlegu formi

„Það er enn langur vegur en meiðslin eru þó ekki jafnslæm og talið var í fyrstu. Þetta er samt óþægilegt,“ segir landsliðsfyrirliðinn Aron Einar Gunnarsson. Akureyringurinn hrökk úr axlarlið í viðureign Íslands og Slóveníu á Laugardalsvelli þann 7. júní og vinnur nú hörðum höndum að því að styrkja öxlina.

„Ég er allavega á áætlun. Sem betur fer þurfti ég ekki að fara í aðgerð. Það hefði þýtt  þriggja mánaða fjarveru af vellinum,“ segir Aron. Sú ákvörðun hafi verið tekin að láta öxlina gróa og styrkja hana vel. Hann segist líka vinna í því þessa dagana að fá hausinn í lag.

„Ég þarf að hætta að pæla í því að ég sé meiddur í öxlinni og fara að einbeita mér að fótboltanum,“ segir Aron. Axlarmeiðsli geta verið erfið viðureignar líkt og önnur meiðsli og skiljanlegt að menn fari sér rólega og passi sig. Hjá atvinnumönnum í knattspyrnu er það hins vegar ekki í boði.

Aron Einar er í kapphlaupi við tímann að verða klár fyrir fyrsta leik Cardiff í ensku úrvalsdeildinni gegn West Ham þann 17. ágúst. Hann hefur æft stíft með liði sínu undanfarnar vikur og er nýkominn úr æfingaferð til Sviss.

„Ég hef tekið þátt í öllum æfingum. Ég reyni að gera allt sem hinir strákarnir gera og missi því þannig séð ekkert úr,“ segir miðjumaðurinn. Hann má þó ekki fara í nein átök í spili í æfingum.

Aron Einar finnur fyrir mikilli eftirvæntingu í leikmannahópi velska liðsins sem spilar í fyrsta skipti í úrvalsdeildinni á komandi leiktíð.

„Menn leggja sig mikið fram til að vinna sér sæti í liðinu og það er vel tekið á því. Menn komu líka til baka í sérstaklega skynsamlegu formi enda framundan tímabil í erfiðustu deild í heimi.“ Hann vonast til þess að vera klár í slaginn gegn West Ham.

„Planið er að ná einum hálfleik eða tveimur áður en tímabilið byrjar.“