Kinnear segist vera bestur

Það hefur verið mikið hlegið að Newcastle fyrir að ráða Joe Kinnear sem yfirmann knattspyrnumála. Kinnear hefur síðan lítið hjálpað sjálfum sér með umdeildum yfirlýsingum upp á síðkastið.

Kinnear er ekki hættur að rífa kjaft og hann mætir til starfa með sjálfstraustið í botni. Segist bera höfuð og herðar yfir aðra í sömu stöðu.

"Ég er örugglega eini yfirmaður knattspyrnumála sem hefur verið knattspyrnustjóri. Ég veit ekki um neinn annan stjóra sem hefur farið í þetta starf," sagði Kinnear.

"Ég hef verið stjóri í 35 ár og hef verið valinn stjóri ársins. Ég hef líka unnið til allra verðlauna sem leikmaður. Þessir kostir setja mig hátt yfir alla aðra í sama starfi. Sumir yfirmenn knattspyrnumála hafa aldrei spilað fótbolta."

Þrátt fyrir þessar staðreyndir hafa stuðningsmenn Newcastle enga trú á honum og krefjast þess að hann verði látinn víkja.