Virðist eiga sér langa ofbeldissögu

Nafn Ariels Castro er að finna víðsvegar í skýrslum lögreglunnar í Cleveland, og hefur hann meðal annars verið sakaður um að ganga í skrokk á sambýliskonu sinni, hóta manni með skóflu og nema barn á brott í skólabíl.

Eins og greint hefur verið frá hefur Castro verið ákærður fyrir mannrán og nauðganir, en hann er talinn hafa haldið þremur konum á heimili sínu gegn vilja þeirra í áratug. Konurnar voru frelsaðar í byrjun síðustu viku, ásamt sex ára gamalli stúlku sem DNA-rannsókn hefur sýnt að er barn Castros.

Haft hefur verið eftir nokkrum ættingja og vina Castros að hann sé kurteis og rólegur maður, bæði vingjarnlegur og hamingjusamur. En þegar skýrslur lögreglunnar í Cleveland eru skoðaðar kemur ýmislegt misjafnt í ljós.

Þann 30. september 1989 óskaði sambýliskona Castros, Grimilda Figueroa, eftir lögregluaðstoð og við skýrslutöku sagði hún Castro hafa ráðist á sig, skellt sér ítrekað utan í vegg og utan í þvottavél. Hún sagði þetta ekki vera í fyrsta skipti sem hann hefði lagt á hana hendur, þó hún hefði aldrei tilkynnt það fyrr. Hún var flutt á sjúkrahús til aðhlynningar vegna áverka á öxl. Engin gögn liggja fyrir um kæru vegna málsins en Figueroa lést í fyrra úr krabbameini.

Í mars 1993 var lögregla kölluð til í skólabíl sem Castro ók, og var hann sakaður af tveimur foreldrum um að hrinda sér þegar þau komu að máli við hann vegna stríðni sem sonur þeirra hafði orðið fyrir í vagninum.

Misþyrmdi sambýliskonunni

Í desember sama ár var Castro handtekinn fyrir árás á Figueroa. Hann var sagður hafa hent henni í jörðina, slegið hana í andlitið og sparkað í hana þar sem hún lá. Figueroa vildi ekki kæra en borgarsaksóknari í Cleveland gaf hins vegar út ákæru. Castro var þó ekki sakfelldur.

Í nóvember 1994 slapp Castro við kæru eftir að hafa verið sakaður um að hóta manni með skóflu. Tveimur árum síðar er hann sagður hafa haft í hótunum við kærasta Figueroa, sem hafði þá farið frá Castro, og sagði maðurinn við skýrslutöku að Castro hefði næstum keyrt yfir sig. Í ágúst sama ár sakaði nágrannakona Castro um að hafa haft í hótunum við sig.

Þann 26. janúar 2004 var Castro svo handtekinn fyrir að nema barn á brott í skólabílnum sem hann ók. Þarna er talið að hann hafi verið búinn að ræna þeim Amöndu Knight og Michelle Berry. Castro er sagður hafa skilið barnið eftir í skólabílnum á meðan hann fór inn á veitingastað til að fá sér að borða. Niðurstöður lögreglurannsóknar voru þó þær að ekki þætti ástæða til að gefa út ákæru þar sem Castro hefði ekki vísvitandi gert barninu mein.