Sonurinn hafði ekki hugmynd

Anthony Castro, sonur eins bræðranna þriggja sem grunaðir eru um að hafa rænt þremur konum og lokað þær inni í tíu ár, segist miður sín yfir því að faðir sinn hafi framið svo skelfilegan glæp.

Þær Amanda Berry, Gina DeJesus og Michelle Knight fundust á heimili Ariels Castro, föður Anthonys, í borginni Cleveland í Bandaríkjunum í gær, ásamt sex ára gamalli stúlku sem Berry er talin hafa alið í prísundinni.

Segir sonurinn að sér hefði aldrei dottið í hug að faðir sinn og föðurbræður bæru ábyrgð á hvarfi stúlknanna, en Anthony skrifaði blaðagrein sem hluta af skólaverkefni árið 2004 um leitina að DeJesus. Þar ræddi hann meðal annars við móður hennar.

Verið er að rannsaka hugsanleg tengsl Castro-bræðranna við konurnar, og óljósar getgátur hafa verið uppi um tengsl Ariels, sem talinn er vera höfuðpaurinn, við DeJesus. Er hann sagður ættingi vinkonu hennar, en enn hefur það ekki fengist staðfest.