Castro er faðir stúlkunnar

Ariel Castro, eigandi hússins í Cleveland þar sem þremur konum var haldið nauðugum í áratug, er faðir sex ára stúlkunnar sem fannst með konunum. Þetta eru niðurstöður DNA-prófs sem Castro var sendur í.

Castro var handtekinn og ákærður fyrir að ræna og nauðga þeim Amöndu Berry, Ginu DeJesus og Michelle Knight, auk þess fyrir að halda barninu í ánauð.

Saksóknarar í Ohio-fylki hyggjast einnig reyna að ákæra Castro fyrir morð, en honum er gefið að sök að hafa fimm sinnum valdið fósturláti hjá einni konunni með því að kýla hana í magann og svelta hana. Verði Castro ákærður fyrir morð gæti hann átt yfir höfði sér dauðarefsingu.