Ein kvennanna eignaðist dóttur í prísundinni

Búið er að handtaka þrjá bræður sem eru grunaðir um að hafa rænt þremur konum og haldið þeim föngnum á heimili eins þeirra í Cleveland í Bandaríkjunum í um tíu ár. Konunum var bjargað í gær auk sex ára gamallar stúlku sem AP fréttastofan segir að sé dóttir Amöndu Berry.

Málið hefur vakið heimsathygli eftir að Amanda Berry tókst að fanga athygli nágranna síns, Charles Ramsay, sem lýsti atburðarrásinni í sjónvarpsviðtölum í gær.

Þar sagði hann meðal annars að hann hefði ekki áttað sig fyllilega á nafninu, en kannast við það enda var leitin að Amöndu mikið í fjölmiðlum vestan hafs þegar hún hvarf árið 2003. Hinar konurnar sem mennirnir virðast hafa rænt hurfu árið 2002 og 2004 en allar hurfu þær skammt frá þar sem þær fundust nú, áratug síðar.

Konurnar voru bundnar á heimili Ariels Castro, eins af bræðrunum, þegar lögreglan kom á vettvang. Þær voru fluttar á spítala en virðast ekki slasaðar.

Nágrannar Castro segja í bandarískum fjölmiðlum að þeir hafi sjaldan orðið varir við Castro á heimili sínu. Einn granninn hélt að enginn byggi þar. Ramsay vakti heimsathygli með líflegri frásögn sinni af því þegar hann bjargaði konunum, en hann hringdi í neyðarlínuna eftir að hafa talað við Berry.

Ramsay sagði um nágranna sinn að þeir hefðu borðað rifjasteik saman og hlustað á salsa-tónlist, og að hann hafi aldrei grunað nágranna sinn um græsku, fyrr en nú.