United með fimmtán stiga forystu | Úrslit dagsins

Rafael skoraði stórkostlegt mark þegar að Manchester United tryggði sér fimmtán stiga forystu á toppi ensku úrvalsdeildarinnar. Öllum fimm síðdegisleikjum dagsins er lokið.

Rafael kom United yfir með þrumufleyg í fyrri hálfleik gegn QPR en markið má sjá með því að smella á hlekkinn hér fyrir ofan. Síðar í leiknum varði hann svo á línu þegar að Chris Samba skallaði að marki fyrir QPR.

Ryan Giggs innsiglaði svo sigurinn í síðari hálfleik en þetta var hans 999. leikur á ferlinum - með Manchester United, velska landsliðinu og breska Ólympíuliðinu. Hann skoraði með skoti í teig eftir sendingu Nani.

United er með 69 stig á toppi deildarinnar, fimmtán stigum meira en grannarnir og Englandsmeistararnir í Manchester City. City á leik til góða gegn Chelsea á morgun.

Arsenal vann sinn þriðja leik í röð í ensku úrvalsdeildinni, nú gegn Aston Villa, 2-1. Santi Cazorla skoraði bæði mörk Arsenal í leiknum. Fyrra markið kom á sjöttu mínútu með laglegu skoti en það síðara af stuttu færi eftir fyrirgjöf nýliðans Nacho Monreal.

Varnarleikur Arsenal hefur þó ekki verið upp á sitt besta að undanförnu og það sýndi sig aftur í kvöld er Andreas Weimann fékk tíma og pláss til að skora með skoti rétt utan vítateigs. Hann jafnaði þá metin fyrir gestina en Cazorla tryggði Arsenal sigurinn á 85. mínútu.

Arsenal er í fimmta sæti deildarinnar sem fyrr en nú með 47 stig. Liðið er einu stigi á eftir Tottenham og tveimur á eftir Chelsea. Bæði eiga þó leik til góða.

Grant Holt tryggði Norwich sigur á Everton, 2-1, með marki í uppbótartíma. Everton komst yfir með marki Leon Osman á 39. mínútu en Norwich skoraði tvívegis á síðustu tíu mínútum leiksins.

Fyrra mark Norwich skoraði Kei Kamara en hann kemur frá Sierra Leone og er fyrstur landa sinna til að skora í ensku úrvalsdeildinni.

Everton er í sjötta sæti deildarinnar og nú búið að missa Arsenal fimm stigum frá sér.

Wigan vann öruggan 3-0 sigur á Reading en með sigrinum komst Wigan úr fallsæti. Pavel Pogrebnyak, leikmaður Reading, fékk að líta rauða spjaldið fyrir ljóta tæklingu.

Þá vann West Brom 2-1 sigur á Sunderland. Romelu Lukaku, sem er lánsmaður frá Chelsea, skoraði bæði mörk West Brom í leiknum. West Brom er í sjöunda sætinu með 40 stig.