Benayoun: Slæmir stjórnunarhættir fóru með Torres

Knattspyrnumaðurinn Yossi Benayoun vill meina að Chelsea hafi skaðað framherjann Fernando Torres, leikmann liðsins, með slæmum stjórnunarhætti knattspyrnustjóra liðsins en þeir hafa verið fjölmargir á þeim tíma sem Spánverjinn hefur dvalið hjá Chelsea.

Benayoun lék við hlið Torres hjá Liverpoll í 142 leikjum hjá Liverpool í þau þrjú og hálft tímabil sem leikmennirnir léku saman. Í þessum leikjum skoraði Torres 81 mark. Benayoun telur að Torres verði aldrei sami leikmaðurinn.

„Það hlýtur að vera erfitt fyrir leikmanninn þar sem hann var einn besti framherji Evrópu á sínum tíma. Hann var magnaður, maður gat gefið boltann á hann og hann skoraði nánast undantekningalaust."

„Hann byrjaði illa hjá Chelsea þegar hann kom til liðsins og var fljótlega settur á bekkinn. Alveg frá byrjun var sjálfstraust hans í molum og umræðan um kaupverðið á leikmanninum truflaði hann augljóslega."

„Fyrir mitt leyti er hann enn einn af bestu framherjunum í heiminum. Maður fer ekki svo auðveldlega frá því að vera einn af þeim bestu í leikmann sem á ekki skilið að vera í liðinu hjá Chelsea. Þetta snýst um hvernig komið var fram við leikmanninn og farið illa með hæfileika hans."