Merlín talar máli Tevez í réttarsalnum

Carlos Tevez, leikmaður Manchester City, þarf að svara til saka fyrir umferðarlagabrot. Hann hefur fengið þekktan lögfræðing í Bretlandi til að verja sig.

Gwyn Lewis er þekktur hjá leikmönnum Manchester City sem Merlín, líkt og töframaðurinn geðþekki. Lewis sérhæfir sig í umferðarlagabrotum og hefur varið þá Joey Barton, Shaun Wright-Phillips og Danny Mills sem eru reyndar allir komnir til annarra félaga.

Tevez var á dögunum handtekinn fyrir að aka án ökuskírteinis en hann var sviptur ökuleyfinu fyrr á þessu ári.

Fram kemur á heimasíðu Burton Copeland, lögfræðingastofunnar sem Lewis starfar á, að hann gangi undir þessu nafni innan veggja City því hann sé þar þekktur fyrir að láta hin ýmsu dómsmál hverfa.