Eigandi Liverpool: Suarez er ekki að fara neitt

John W Henry, aðaleigandi Liverpool, hefur lokað á þann möguleika að félagið muni selja Luis Suárez til Arsenal en Bandaríkjamaðurinn segir það væri fáránlegt að selja besta leikmann liðsins til samkeppnisaðila.

Luis Suárez hefur farið í hart til þess að fá sig lausan frá Liverpool en bæði knattspyrnustjórinn Brendan Rodgers og nú eigandinn John W Henry hafa svarað honum fullum hálsi í enskum fjölmiðlum.

„Við erum ekki að fara að selja Luis," sagði John W Henry í viðtali við Guardian en hann er nú í stuttri heimsókn til Bítlaborgarinnar.

„Það er gríðarlega mikilvægt fyrir félög að selja ekki sína bestu menn til samkeppnisaðila og það er sérstaklega mikilvægt að það gerist ekki hjá Liverpool fyrst að liðið er ekki í Evrópukeppni í ár," sagði Henry.

„Það væri fáránlegt að selja Luis Suárez til Arsenal. Liverpool á að vera í Evrópukeppni og liðið þarf að komast í Meistaradeildina. Um það snýst þetta hjá Liverpool," sagði Henry.

John W Henry hefur ennfremur látið Suárez og umboðsmann hans, Pere Guardiola, vita af því að Úrúgvæmaðurinn verður ekki seldur í þessum félagsskiptaglugga.