Hafði á tilfinningunni að Nani myndi vinna leikinn fyrir okkur

Sir Alex Ferguson, stjóri Man. Utd, var að vonum ánægður með sigur sinna manna á Reading í bikarnum í kvöld. Kallinn virkaði stressaður á hliðarlínunni og leit oft á klukku sína. Hann vildi augljóslega ekki annan leik.

"Þetta var virkilega góður bikarleikur. Þeir settu pressu á okkur eftir að þeir minnkuðu muninn. Við spiluðum samt frábæran fótbolta og hefðum getað skorað fullt af mörkum í þessum leik," sagði Ferguson.

"Ég er sáttur við gæðin í okkar leik. Við hefðum samt átt að refsa þeim meira. Maður er aldrei rólegur í stöðunni 2-0," sagði Skotinn og hrósaði síðan Nani sem átti frábæra innkomu.

"Nani átti skilið að vera valinn maður leiksins. Hans framlag var frábært. Ég hafði á tilfinningunni að hann myndi vinna leikinn fyrir okkur."