Van Persie og Welbeck báðir með tvö mörk í 4-1 sigri United

Hollendingurinn Robin van Persie er heldur betur að byrja vel undir stjórn David Moyes. Van Persie skoraði tvö mörk í 4-1 útisigri United á Swansea í kvöld í fyrstu umferð ensku úrvalsdeildarinnar.

Moyes stýrði því United til sigurs í fyrsta deildarleiknum og skoski knattspyrnustjórinn getur ekki kvartað mikið yfir þessari byrjun. Van Persie skoraði bæði mörkin þegar Manchester United vann Samfélagsskjöldinn um síðustu helgi.

Danny Welbeck skoraði einnig tvö mörk í þessum flotta sigri eins og Van Persie. Það voru fleiri góðar fréttir fyrir stuðningsmenn Manchester United því Wayne Rooney kom inn á sem varamaður á 61. mínútu og lagði upp tvö síðustu mörk liðsins.

Bæði mörk Robin van Persie voru af betri gerðinni. Það fyrra skoraði hann á 34. mínútu þegar hann tók niður sendingu Ryan Giggs og klippti boltann skemmtilega í markið. Það seinna skoraði kappinn með frábæru skoti fyrir utan teig á 72. mínútu eftir að hafa fengið sendingu frá varamanninum Wayne Rooney.

Danny Welbeck skoraði fyrra mark sitt tveimur mínútum eftir að Van Persie kom United í 1-0 en Welbeck fékk þá óeigingjarna sendingu frá Antonio Valencia.

Wilfried Bony minnkaði muninn fyrir Swansea í sínum fyrsta leik í ensku úrvalsdeildinni áður en Danny Welbeck innsiglaði sigurinn í uppbótartíma.