Brendan Rodgers: Frábær frammistaða

Brendan Rodgers, knattspyrnustjóri Liverpool, hrósaði sínu liði fyrir frammistöðuna í 1-0 sigri á Stoke í fyrsta leik tímabilsins í ensku úrvalsdeildinni sem fór fram á Anfield í dag en neitaði aftur á móti að ræða mál Luis Suarez.

„Þetta var frábær framistaða hjá öllu liðinu. Stoke og Mark Hughes eiga hrós skilið því Stoke kom hingað og spilaði vel," sagði Brendan Rodgers. Liverpool fékk fjölda færa til að bæta við mörkum en gat einnig þakkað fyrir að Stoke-liðið stal ekki stigi.

Luis Suarez var meðal áhorfenda á Anfield en Brendan Rodgers ætlaði ekki að láta Úrúgvæmanninn stela sviðsljósinu af sínum leikmönnum.

„Ég ætla ekki að segja neitt um Luis Suarez vegna þeirrar virðingar sem ég ber fyrir þeim leikmönnum Liverpool sem eru að gefa allt sitt til liðsins. Það eina sem ég vel láta hafa eftir mér er að ég mjög ánægður með hvernig málið er að þróast. Við í klúbbnum horfum nú fram á veginn," sagði Rodgers.