55 ár síðan tveir United-menn skoruðu tvö mörk í fyrsta leik

Robin van Persie og Danny Welbeck skoruðu báðir tvö mörk í Swansea í Wales í kvöld þegar Manchester United byrjaði titilvörnina og stjóratíð David Moyes á sannfærandi 4-1 sigri á Swansea City.

Þetta var sögulegur leikur því það voru liðin 55 ár síðan að tveir leikmenn Manchester United náðu að skora tvö mörk í fyrsta leik tímabilsins.

Það gerðist síðast árið 1958 þegar Bobby Charlton (3 mörk) og Alex Dawson (2 mörk) skoruðu saman fimm mörk í fyrsta leik liðsins.

Robin van Persie heldur uppteknum hætti frá því á síðustu leiktíð en Danny Welbeck er hinsvegar þegar búinn að jafna allt markaskor sitt frá síðasta tímabili. Þetta var frábær vika hjá Danny Welbeck sem skoraði einnig fyrir enska landsliðið.