David Moyes: Þetta var ekta Manchester United frammistaða

David Moyes, knattspyrnustjóri Manchester United, var kátur eftir 4-1 sigur á Swansea City í Wales í kvöld en þetta var fyrsti deildarleikur liðsins undir hans stjórn.

„Þetta var án nokkurs vafa ekta Manchester United frammistaða. Við nýttum færin vel og ég er mjög ánægður með leikinn," sagði David Moyes við BBC.

„Það er erfitt að koma hingað og þetta var sannfærandi sigur í lokin," sagði Moyes.

„Þetta var fyrsti leikur minn með Manchester United, ég er spenntur en þetta er samt bara vinnan mín. Ég er bara að gera það sama og ég hef gert hjá Everton undanfarinn áratug," sagði Moyes.

„Robin van Persie skoraði tvö frábær mörk í þessum leik. Þegar hann hittir boltann vel þá er boltinn alltaf að fara inn," sagði Moyes.