Laudrup: United er í allt annarri deild heldur en við

Michael Laudrup, knattspyrnustjóri Swansea City, horfði upp á sína menn tapa 1-4 á móti Manchester United í kvöld í fyrstu umferð ensku úrvalsdeildarinnar.

„Það gekk allt vel fyrsta hálftímann en svo skora þeir tvö mörk. Fyrri markið var frábær afgreiðsla hjá Van Persie en við gerðum stór mistök í hinu markinu. Það var erfitt að koma til baka eftir tvö mörk á tveimur mínútum," sagði Michael Laudrup.

„Við héldum áfram allan leikinn en nýting á færunum var munurinn á liðunum. Við verðum að sætta okkur við af þrjú af fjórum mörkum þeirra voru í heimsklassa," sagði Laudrup.

„1-4 eru slæm úrslit fyrir okkur en lið Manchester United er bara í allt annarri deild heldur en við. Við erum ekki ánægðir en við verðum að horfa fram á veginn og það er mikilvægur leikur í Evrópudeildinni á fimmtudaginn," sagði Laudrup.