Arsenal og Norwich skildu jöfn í ótrúlegum leik | Dýrmæt stig í súginn

Eina leik dagsins í ensku úrvalsdeildinni er lokið með 3-3 jafntefli Arsenal og Norwich í einum skemmtilegasta leik tímabilsins til þessa.

Arsenal komst tvívegis yfir í leiknum en var þó undir í hálfleik, 2-1. Robin Van Persie skoraði svo tvisvar með skömmu millibili undir lok leiksins og virtist ætla að tryggja sínum mönnum sigurinn.

En allt kom fyrir ekki. Steve Morison jafnaði metin fimm mínútum fyrir leikslok og þar við sat.

Van Persie fékk þó eitt dauðfæri til viðbótar sem hann nýtti sér ekki og þá átti hann að fá vítasprnu þegar að Kyle Naughton braut á honum.

En Norwich átti þó heilmikið í leiknum og fengu bæði lið fjölda færa í leiknum sem þau fóru illa með.

Yossi Benayoun skoraði fyrsta mark leiksins strax á annarri mínútu með glæsilegu skoti en Wes Hoolahan jafnaði metin tíu mínútum síðar með skoti sem Wojciech Szczesny hefði átt að verja.

Annað mark Norwich var einnig óheppilegt en Grant Holt átti skot að marki sem hafði viðkomu í Kieran Gibbs, varnarmanni Arsenal, og yfir Szczesny í markinu.

Van Persie jafnaði svo metin eftir frábæra sendingu frá Alex Song inn fyrir varnarlínu gestanna. Það var svo meiri heppnisstimpill á síðar marki Van Persie en boltinn féll fyrir fætur hans í teignum og skoraði Hollendingurinn öflugi örugglega úr skotinu.

En Norwich gafst ekki upp og komst í skyndisókn á 85. mínútu. Jonny Howson gaf á Morison sem hafði nægan tíma til að athafna sig og skoraði með föstu skoti í markhornið fjær.

Arsenal er nú með 67 stig og getur mest komist upp í 70 stig. Tottenham og Newcastle eiga þó bæði tvo leiki eftir og geta mögulega komist upp í 71 stig og ýtt Arsenal þar með niður í fimmta sætið.

Lærisveinar Arsene Wenger þurfa því að treysta á hagstæð úrslit í öðrum leikjum til að komast aftur í Meistaradeildina á næstu leiktíð.

Norwich er í þrettánda sæti með 44 stig.