Sheffield Wednesday upp í ensku B-deildina

Sheffield Wednesday vann sér í dag sæti í ensku B-deildinni eftir að hafa unnið 2-0 sigur á Wycombe í lokaumferð C-deildarinnar í dag.

Grannliðið Sheffield United gerði á sama tíma jafntefli við Exeter sem skipti þó á endanum ekki máli þar sem Wednesday vann sinn leik.

Charlton var búið að tryggja sér titilinn í C-deildinni en United, Huddersfield, MK Dons og Stevenage munu taka þátt í umspilinu um þriðja sætið.

Chesterfield, Exeter og Rochdale féllu í D-deildina. Swindon og Shrewsbury komust upp úr D-deildinni en í umspilið komust lið Crawley, Southend, Torquay og Cheltenham.

Sheffield Wednesday er sögufrægt lið sem hefur fjórum sinnum orðið enskur meistari - þó ekki síðan 1930. Liðið staldraði við í ensku C-deildinni í aðeins tvö ár í þetta skiptið.