Tveir "risa"-sigrar hjá Wigan í röð - afdrifaríkar 94 sekúndur hjá Arsenal

Wigan Athletic fylgdi eftir óvæntum sigri á Manchester United í síðustu viku með því að vinna 2-1 útisigur á Arsenal í ensku úrvalsdeildinni í kvöld. Þetta var fjórði sigurinn í síðustu fimm leikjum hjá lærisveinunum hans Roberto Martinez en að sama skapi var þetta aðeins annað tap Arsenal-liðsins í síðustu 10 deildarleikjum.

Wigan-liðið skoraði bæði mörkin sína á 94 sekúndna kafla í upphafi leiks og þrátt fyrir stórsókn Arsenal-manna og fjölda færa tókst þeim aðeins að skora eitt mark.

Franco di Santo kom Wigan í 1-0 á 7. mínútu eftir sendingu frá Jordi Gomez. Arsenal var að taka hornspyrnu þegar Wigan náði skyndisókn sem endaði með að Di Santo skoraði.

Arsenal-menn voru greinilega í miklu sjokki eftir þetta óvænta mark því það liðu ekki nema 94 sekúndur þar til að Jordi Gomez var búinn að koma Wigan í 2-0. Markið kom af stuttu færi á 8. mínútu eftir að Arsenal-vörninni tókst ekki að koma burtu fyrirgjöf frá Victor Moses.

Thomas Vermaelen minnkaði muninn á 21. mínútu með skalla eftir fyrirgjöf frá Tomás Rosicky. Arsenal-liðið fékk fjölda færa þar sem eftir var leiksins en inn vildi boltinn ekki og gestirnir fögnuðu frábærum sigri.

Wigan er nú búið að vinna fjóra leiki í síðustu fimm leikjum en meðal þeirra lið sem þeir hafa unnið á þessum kafla eru Manchester United, Arsenal og Liverpool. Wigan er þar með komið fimm stigum frá fallsæti en fyrir nokkrum vikum leit þetta ekki vel út hjá liðinu.



Staðan í ensku úrvalsdeildinni.