Bale missir af Ólympíuleikunum vegna bakmeiðsla

Ljóst er að Ólympíulið Breta verður án vængmannsins Gareth Bale á leikunum í sumar. Bale glímir við bakmeiðsli sem koma í veg fyrir þátttöku hans.

Landsliðshópur Breta verður ekki tilkynntur fyrr en í næstu viku. Þó lak út í vikunni að David Beckham hefði ekki verið valinn í hópinn en hver þjóð má velja þrjá leikmenn eldri en 23 ára.

Craig Bellamy, Micah Richards og Ryan Giggs verða fulltrúar eldri kynslóðarinnar í hópnum en ljóst er að Gareth Bale verður sárt saknað.

Bretar eru í riðli A á leikunum en þar mæta þeir Senegal, Úrúgvæ og Sameinuðu Arabísku Furstadæmunum.

Fyrsti leikur liðsins, sem þjálfað er af Stuart Pearce, verður gegn Senegal á Old Trafford 26. júlí. Ólympíuleikarnir verða formlega settir þann 27. júlí.