Gareth Bale skrifaði undir nýjan samning hjá Tottenham

Gareth Bale verður áfram hjá Tottenham en hann er búinn að skrifa undir nýjan fjögurra ára samning við félagið. Bale er 22 ára gamall og hefur verið hjá Tottenham frá árinu 2007 þegar hann kom þangað frá Southampton.

Bale hefur verið orðaður við önnur lið að undanförnu en nú er ljóst að hann mun spila áfram á White Hart Lane og þá hugsanlega við hlið Gylfa Þórs Sigurðssonar fari svo að íslenski landsliðsmaðurinn komi til Spurs.

„Ég hef verið hérna í fimm ár og ef notið hverrar mínútu. Stuðningsmennirnir hafa reynst mér frábærlega og það væri æðislegt að geta launað þeim stuðninginn. Félagið er í sókn og ég vil taka þátt í því. Það var því frábært að ganga frá þessum samningi," sagði Gareth Bale í viðtali á heimasíðu Tottenham.

„Ég elska félagið og stuðningsmennina og ég vil hjálpa til að koma Tottenham aftur í Meistaradeildina þar sem við eigum heima. Við erum með ungan og góðan leikmannahóp og þurfum að vinna saman til að koma okkur aftur inn á stóra sviðið," sagði Bale.

Gareth Bale hefur skorað 29 mörk í 160 leikjum með Tottenham og unnið sér sæti í velska landsliðinu. Hann hefur verið tvisvar sinnum verið kosinn besti ungi leikmaður félagsins á síðustu þremur árum.

Gareth Bale var með 10 mörk og 14 stoðsendingar í 36 leikjum í ensku úrvalsdeildinni á síðustu leiktíð en hann vakti mikla athygli þegar hann skoraði 4 mörk og gaf 4 stoðsendingar í Meistaradeildinni veturinn 2010 til 2011.