Cazorla á leið í læknisskoðun hjá Arsenal

Spænski landsliðsmaðurinn Santi Cazorla verður væntanlega orðinn leikmaður Arsenal fyrir helgi en Sky Sports segir frá því að hann muni gangast undir læknisskoðun á Emirates í vikunni.

Santi Cazorla leikur með Malaga en hefur verið orðaður við Arsenal í allt sumar. Arsenal mun væntanlega borga í kringum 22 milljónir evra fyrir hann og leikmaðurinn sjálfur er sáttur með samningstilboðið.

Malaga keypti Santi Cazorla frá Villarreal fyrir aðeins tólf mánuðum síðan og græðir um þrjár milljónir evra á honum. Malaga er í fjárhagsvandræðum og þarf að redda um 40 milljónum evra fyrir lok þessara viku.

Santi Cazorla er 27 ára vængmaður sem var í Evrópumeistaraliði Spánar í sumar. Hann var með 9 mörk og 6 stoðsendingar í 38 leikjum með Malaga í spænsku úrvalsdeildinni á síðustu leiktíð en Malaga-liðið endaði þar í 4. sæti.