Vilja fá ungt fólk til að striplast í meira mæli

Nektarstrendur og álíka staðir eru iðulega þéttsetnir af eldra fólki. Forsvarsmenn nektargarðs í Flórída í Bandaríkjunum berjast nú fyrir því að fá ungt fólk til að afklæðast og skemmta sér á adams- og evuklæðunum.

Greint var frá þessu í The South Florida Sun Sentinel fyrr í vikunni.

Þar kemur fram að stjórnendur nektargarðsins Sunsport Garden muni standa fyrir mikilli skemmtun þessa helgi og er ungt fólk, á aldrinum 18 til 30, sérstaklega velkomið.

Það verður nóg um að vera í partíinu. Heitu pottarnir verða víst opnir allan sólarhringinn og áhugasamir geta tekið þátt í trommuhring.

Svo virðist sem að ungt fólk í suður-Flórída hafi tekið vel í hugmyndina. Búist er við að nokkur hundruð ungmenna muni mæta allsbert á staðinn.