Wilshere verður ekki klár með Arsenal í fyrstu umferð

Arsene Wenger, knattspyrnustjóri Arsenal, segir að Jack Wilshere leikmaður liðsins verði jafnvel ekki klár í slaginn með liðinu fyrr en í október. Enski landsliðsmaðurinn var frá allt síðasta keppnistímabil vegna meiðsla og hann fór nýlega í hnéaðgerð sem framkvæmd var af sérfræðingum í Svíþjóð.

„Ég er bjartsýnn en hann er ekki byrjaður að æfa með liðinu, leikmaður sem er enn í séræfingum í líkamsræktarsalnum í júlí er ekki að fara að hefja tímabilið með liðinu í ágúst," sagði Wenger á fundi með fréttamönnum í æfinga- og keppnisferð liðsins í Austurlöndum fjær.

Það vantar fjölmarga af leikmönnum Arsenal í þessa keppnisferð og má þar nefna Lukas Podolski og Olivier Giroud sem komu til liðsins í sumar. Að auki fóru þeir Robin van Persie, Laurent Koscielny, Per Mertesacker, Bacary Sagna ogTomas Rosicky ekki með í þessa keppnisferð.