Mancini: 101 prósent líkur á því að Balotelli verði áfram hjá City

Roberto Mancini, stjóri Manchester City, er maður fyrirgefningarinnar ef marka má stormasöm sambönd hans við leikmenn eins og Carlos Tevez og Mario Balotelli. Mancini hefur tekið þá báða í sátt eftir að hafa úthúðað þeim fyrr á tímabilinu og nú hefur ítalski stjórinn gefið það út að Balotelli verði áfram hjá City.

Fjölmiðlar á Ítalíu hafa verið að skrifað um það að AC Milan og Manchester City væru að ræða skipti á Zlatan Ibrahimovic og Mario Balotelli en Mancini þvertekur fyrir það í viðtali við ítalska stórblaðið

Gazzetta dello Sport.

„Ibra er frábær leikmaður en ég held að AC Milan hafi engan áhuga á því að selja hann. Ég ítrekað þetta því enn á ný: Það eru 101 prósent líkur á því að Balotelli verði áfram hjá Manchester City," sagði Roberto Mancini.

Mario Balotelli var með 13 mörk og 1 stoðsendingu í 23 leikjum með Manchester City í ensku úrvalsdeildinni á þessu tímabili. Eina stoðsendingin var heldur betur mikilvæg því hann lagði upp sigurmark Sergio Agüero á fjórðu mínútu í uppbótartíma í lokaleiknum. Það mark tryggði City titilinn í fyrsta sinn í 44 ár.