Portsmouth hefur tímabilið í C-deildinni með tíu stig í mínus

Ekkert lát er á slæmum tíðindum af enska knattspyrnufélaginu Portsmouth. Nú liggur fyrir að liðið hefur tímabilið í ensku C-deildinni með tíu stig í mínus. Guardian greinir frá þessu.

Góðu fréttirnar fyrir Portsmouth er að félagið fær yfirleitt þátttökurétt í deildinni en það þótti óvíst enda félagið í greiðslustöðvun og óvíst hver næsti eigandi eða eigendur félagsins verða.

Auk þess að hefja komandi tímabil með neikvæðan stigafjölda hefur verið sett hámark á þær skuldir sem leyfilegt verður að flytja úr skuldsetta gamla félaginu yfir í það nýja.

Portsmouth hefur verið í frjálsu falli undanfarin þrjú ár. Félagið fór í greiðslustöðvun auk þess sem stig voru tekin af liðinu leiktímabilið 2009-2010 en þá lék liðið í úrvalsdeildinni.

Liðið féll úr úrvalsdeildinni og í vor féll liðið úr Championship-deildinni (b-deild). Aftur voru stig dregin af félaginu eftir að það fór í greiðslustöðvun í annað skiptið á þremur árum.