Granero samdi við QPR

QPR hefur gengið frá kaupum á Esteban Granero frá Spánarmeisturum Real Madrid. Granero gerði fjögurra ára samning við enska liðið.

Granero er uppalinn hjá Real Madrid og á að baki 60 leiki með aðalliði félagsins. „Hann er fyrst og fremst frábær leikmaður. Aðeins frábærir leikmenn fá að spila með Real Madrid," sagði Mark Hughes, stjóri QPR.

„Hann hefur verið hjá Real síðan hann var níu ára gamall og þetta var því stór ákvörðun í hans lífi. Þetta sýnir að hann hefur trú á því sem við ætlum okkur að gera hér."

Sjálfur sagðist Granero spenntur fyrir því að spila í Englandi „Ég elska ástríðu ensku stuðningsmannanna og mér skilst að stuðnigsmenn QPR séu meðal þeirra bestu. Ég vil eiga bjarta framtíð hér."

„Ég er spenntur fyrir því að taka þátt í svo spennandi kafla í sögu þessa félags. Aðrir leikmenn sem hafa komið til félagsins að undaförnu eru jafn spenntir og ég og við vitum að QPR getur orðið eitt af bestu félögum Englands."

QPR hefur verið duglegt á leikmannamarkaðnum í sumar. Liðið hefur fengið þá Ryan Nelsen, Andy Johnson, Robert Green, Samba Diakite, Fabio da Silva, Park Ji-Sung, Junior Hoilett, Jose Bosingwa og Julio Cesar til félagsins, auk Granero.