Alex McLeish rekinn frá Aston Villa

Alex McLeish hefur verið rekinn sem þjálfari Aston Villa en liðið rétt slapp við fall úr ensku úrvalsdeildinni á þessu tímabili. McLeish var á sínu fyrsta tímabili með Aston Villa en fyrir ári síðan hætti hann sem stjóri nágrannanna í Birmingham City.

"Félagið hefur verið vonsvikið með úrslitin og spilamennskuna á þessu tímabili sem og þau skilaboð sem hún sendir stuðningsmönnum félagsins. Stjórnin vill fullvissa okkar stuðningsmenn að hún gerir sér vel grein fyrir því að Villa á meira skilið og stjórnin ætlar að gera allt til þess að bæta gengi liðsins," sagði í yfirlýsingu frá Aston Villa.

Aston Villa vann aðeins 9 af 42 leikjum undir stjórn Alex McLeish sem gerir aðeins 21,4 prósent sigurhlutfall. Birmingham náði í 36,9 prósent stiga undir hans stjórn. Hann hefur einnig stýrt Rangers, Hibernian og Motherwell.

Þetta er annað sumarið í röð sem Aston Villa skiptir um stjóra en Gérard Houllier hætti með liðið fyrir ári síðan eftir að Martin O'Neill hafði verið stjóri Villa frá 2006 til 2010.