Óvíst hvort Robin van Persie fari með Arsenal til Asíu

Robin van Persie mun á næstu dögum ræða formlega við forráðamenn Arsenal um framtíð hans hjá félaginu. Hollenski landsliðsframherjinn hefur ekki viljað skrifað undir samning við félagið en núverandi samningur hans rennur út í lok næsta keppnistímabils sem hefst um miðjan ágúst.

Það er ekki ljóst hvort van Persie fari með enska úrvalsdeildarliðinu í keppnisferðina sem fyrirhuguð er til Asíu. Robin van Persie hefur æft með Arsenal eftir að leikmenn komu saman eftir sumarfrí.

Liðið mun fara til Kuala Lumpur á laugardag en í þessu keppnisferðalagi mun Arsenal mæta m.a. Englandsmeistaraliði Manchester City þann 27. júlí. Enskir fjölmiðlar hafa greint frá því að Man City hafi áhuga á að kaupa van Persie fyrir allt að 20 milljónir punda, eða sem nemur 4 milljörðum ísl. kr. Manchester United hefur einnig sýnt leikmanninum áhuga líkt og ítalska meistaraliðið Juventus.

Samkvæmt frétt Telegraph hafa forráðamenn Arsenal boðið van Persie fimm ára samning sem myndi tryggja honum 130.000 pund á viku í laun eða sem nemur 26 milljónum ísl. kr. Árslaun hans yrðu því um 1,3 milljarðar kr.

Arsenal seldi Samir Nasri til Man City í fyrra fyrir 24 milljónir punda eða sem nemur 4,7 milljörðum ísl. kr. og er líklegt að Arsenal vilji fá hærri upphæð fyrir van Persie sem var markahæsti leikmaður ensku úrvalsdeildarinnar á síðustu leiktíð.