Yfirlýsing frá Molde: Solskjær er að tala við Aston Villa

Norsku meistararnir í Molde hafa gefið út fréttatilkynningu á heimasíðu sinni þar sem kemur fram að Ole Gunnar Solskjær, þjálfari liðsins, sé í viðræðum við Aston Villa um að taka við enska liðinu.

Ole Gunnar Solskjær er fyrrum leikmaður Manchester United og gerði Molde að norskum meisturum á sínu fyrsta ári sem þjálfari liðsins. Solskjær fór heim til Noregs og tók við sínu uppeldisliði sem vann í kjölfarið sinn fyrsta meistaratitil í sögunni.

Bandaríkjamaðurinn Randy Lerner er eigandi Aston Villa og ætlar að leita til Solskjær um að taka við af Alex McLeish sem var rekinn eftir aðeins eitt ár í starfi. Aston Villa rétt slapp við fall úr ensku úrvalsdeildinni á nýloknu tímabili og frammistaða liðsins þótti ekki merkileg.

Ole Gunnar Solskjær er 39 ára gamall og fékk sína fyrstu reynslu af þjálfun með varaliði United en hann lagði skóna á hilluna árið 2007 eftir að hafa skorað 126 mörk í 366 leikjum með Manchester United.