Park: Ég vil klára ferilinn hjá United

Það bendir flest til þess að Ji-Sung Park sé á leiðinni frá Manchester United þótt að hann vilji sjálfur spila áfram með liðinu. Park á eitt ár eftir af samningi sínum en nýjustu sögusagnirnar eru að hann verði skiptimynt í kaupum United á Sjinji Kagawa hjá Dortmund.

Ji-Sung Park kom til Manchester United frá PSV Eindhoven árið 2005 og hefur tekið þátt í að vinna ellefu titla þar af enska meistaratitilinn fjórum sinnum. Hann er vinnusamur og ósérhlífinn leikmaður en fékk ekki alltof mörg tækifæri á þessu tímabili.

„Ég vil enda ferilinn minn hjá United en það sem ég vil fer ekki alltaf saman með raunveruleikanum. Nú þarf ég að hvíla mig, bæði líkamlega og andlega," sagði Ji-Sung Park.

Ji-Sung Park tók þátt í 28 leikjum á tímabilinu og skoraði í þeim 3 mörk. Hann var aðeins með í 17 leikjum í ensku úrvalsdeildinni eða minna en helming leikja tímabilsins. Flestir leikja hans voru fyrir áramót.

Frá og með febrúar kom hann aðeins við sögu í þremur leikjum, kom inn á sem varamaður á móti bæði Chelsea og Tottenham og spilaði síðan 57 mínúturnar í 1-0 tapi á móti Manchester City í úrslitaleiknum um titilinn.