Sevilla hefur áhuga á Aroni Einari

Samkvæmt spænskum fjölmiðlum hefur úrvalsdeildarfélagið Sevilla áhuga á að klófesta íslenska landsliðsmanninn Aron Einar Gunnarsson.

Fótbolti.net greinir frá þessu í kvöld en samkvæmt frétt spænsku útvarpsstöðvarinnar Cadena Ser er Aron Einar ofarlega á óskalista forráðamanna Sevilla, sem hafnaði í níunda sæti spænsku úrvalsdeildarinnar í vor.

Aron Einar er 23 ára gamall en hefur þrátt fyrir það verið í atvinnumennsku í sex ár. Hann hóf ferilinn hjá AZ í Hollandi en hélt nítján ára gamall til Coventry í Englandi, þar sem hann var í þrjú tímbil.

Hann skipti svo yfir í Cardiff fyrir nýliðið tímabil þar sem hann gegndi lykilhlutverki. Cardiff komst í umspil ensku B-deildarinnar en tapaði fyrir West Ham í undanúrslitum.