Ekki tekist í hendur fyrir leik Chelsea og QPR

Forráðamenn ensku úrvalsdeildarinnar hafa ákveðið að leikmenn Chelsea og QPR munu ekki takast í hendur fyrir leik liðanna í deildinni nú á sunnudaginn.

Sami háttur var hafður á þegar liðin mættust í bikarnum fyrr á árinu en hingað til hefur verið talið að leikmenn yrðu látnir takast í hendur á sunnudaginn, rétt eins og í öðrum leikjum úrvalsdeildarinnar.

Anton Ferdinand, sem hefur sakað John Terry, fyrirliða Chelsea, um kynþáttaníð í sinn garð var í enskum fjölmiðlum í dag sagður ætla að hunsa Terry og ekki taka í hönd hans fyrir leikinn.

Lögreglan rannsakaði málið sem kom upp í leik liðanna í haust. Málið var sent til saksóknara og verður réttað í því þann 9. júlí næstkomandi.

„Enska úrvalsdeildin er staðföst í þeirri afstöðu sinni að leikmenn eigi að takast í hendur fyrir leiki," sagði í yfirlýsingu frá stjórn deildarinnar í kvöld.

„Hins vegar hefur verið ákveðið að þetta verði ekki gert fyrir leik Chelsea og QPR um helgina eftir viðræður við bæði félögin sem og vegna þeirra lagalegu aðstæðna sem John Terry og Anton Ferdinand eru í."

Terry hefur gengið í gegnum ýmislegt á leiktíðinni en fyrirliðaband enska landsliðsins var til að mynda tekið tímabundið af honum vegna þessa máls. Þá mun hann missa af úrslitaleik Meistaradeildar Evrópu, þar sem Chelsea mætir Bayern München, þar sem hann fékk að líta beint rautt spjald fyrir að reka hnéð í Alexis Sanchez, leikmann Barcelona, í undanúrslitunum nú á þriðjudagskvöldið.