Muamba kennir of miklu álagi um hjartaáfallið

Knattspyrnumaðurinn Fabrice Muamba, sem fékk hjartaáfall í leik Bolton gegn Tottenham í ensku úrvalsdeildinni í mars á þessu ári, segir að hann hafi lagt of hart að sér við æfingar á undirbúningstímabilinu sumarið 2011.

Muamba segir í viðtali við sjónvarpsstöðina ITV4 að hann hafi æft of mikið í æfingabúðum Bolton sem fram fóru í Bandaríkjunum áður en keppnistímabilið hófst sumarið 2011.

Richard Schilling, sem er hjartasérfræðingur, segir að það sé ólíklegt að tveggja vikna ofþjálfun hafi gert það verkum að Muamba hafi fengið hjartaáfall sex mánuðum síðar.

„Ég held að ég hafi lagt of mikið á mig – kannski gekk ég of langt. Ég var í góðu ástandi, en ég vildi gera enn betur, og vera í betra ástandi en allir aðrir," segir Muamba m.a. í viðtalinu. Hann er hættur að leika knattspyrnu sem atvinnumaður en hann er aðeins 24 ára gamall. Muamba lék með öllum yngri landsliðum Englendinga.