Uppvakningur í framboð - keyrir á einu máli

Uppvakningur mun tilkynna um framboð sitt til embættis forseta Bandaríkjanna á næstu dögum. Hræið, sem kallar sig A. Zombie, mun ferðast um landið á næstu dögum ásamt mennskri konu sinni.

Framboðið mun vafalaust lífga upp á kosningabaráttuna í Bandaríkjunum. A. Zombie og eiginkona hans, Patty Morgan-Zombie, munu heimsækja sex borgir á næstu dögum en framboðið verður formlega kynnt í San Diego í næstu viku. Hjónin munu einnig heimsækja flokksþing Demókrata og Repúblikana í Charlotte og Tampa.

Kosningaloforð A. Zombie þykja afar einföld. Aðspurður um skoðanir sínar á umhverfisvernd sagði hann aðeins fjögur orð: minnka, endurnýta, endurvinna, endurholga.

„Eiginmaður minn hefur helgað líf sitt, og framhaldslífi, baráttunni fyrir réttindum uppvakninga og áhorfenda," sagði Morgan-Zombie í samtali við Reuters fréttastofuna. „Hann mun berjast fyrir því að koma uppvakningum á öll heimili í Bandaríkjunum — jafnvel þó að það drepi hann aftur."

Margir hafa þó haft orð á því að A. Zombie sigli undir fölsku flaggi. Líklegt þykir að framboðið sé í raun slunginn auglýsingaherferð fyrir nýjustu þáttaröðina af The Walking Dead sem tekin verður til sýninga seinna á þessu ári.