Kínverskur bóndi smíðaði sér nýja handleggi

Síðustu átta ár hefur kínverski bóndinn Sun Jifa unnið sleitulaust að því að smíða sér gervihendur. Gervilimirnir eru nú tilbúnir og Jifa getur loks hugsað um búið sitt.

Jifa missti báða framhandleggi sína þegar hann var að setja saman heimagerða sprengju sem hann ætlaði að nota við veiðar. Bóndinn var algjörlega óvinnufær eftir slysið og ljóst var að hefðbundnir gervilimir voru allt of dýrir.

Jifa dó þó ekki ráðalaus. Með því að nota brotajárn, slöngur, límband og hugvitið tókst honum að smíða gervihendur sem hann getur hreyft og gripið með. Jifa getur nú loks séð um búið, borðað án aðstoðar, burstað í sér tennurnar og jafnvel spilað á munnhörpu og ekið mótorhjólinu sínu.

Jifa vinnur nú að nýrri útgáfu af gervilimunum. Hann mun þó ekki rukka fyrir hönnun sína heldur verða gervihendurnar gefnar þeim sem glatað hafa útlimum sínum.