Curiosity rúntar um yfirborð Mars

Vitjeppinn Curiosity fór í sínu fyrstu ökuferð um Mars í dag. Rúnturinn var þó stuttur og tók aðeins sextán mínútur. Síðustu daga hefur Curiosity farið yfir hugbúnað og tækjakost sinn. Fyrr í vikunni notaði hann ChemCam greiningartólið í fyrsta sinn en það rýnir í berg rauðu plánetunnar með leysigeisla.

Þá hefur einnig komið í ljós að Curiosity varð fyrir skemmdum þegar hann lenti á Mars. Búnaður sem greinir vindhraða og aðrar veðurfræðilegar upplýsingar varð fyrir hnjaski þegar farið nálgast yfirborð Mars.

Einnig er vert að minnast á að lendingarstaður Curiosity hefur verið nefndur í höfuðið á vísindaskáldsagnahöfundinum Ray Bradbury. Hann hefði orðið 92 ára gamall í dag.

NASA hefur nú birt ítarlegt myndband af lendingarferlinu, og það í háskerpu. Hægt er að nálgast myndbandið hér fyrir ofan.