Amnesty: Óbreyttir borgarar skotmörk í Aleppo

Mannréttindasamtökin Amnesty International hafa birt skýrslu um átökin í Aleppo, fjölmennustu borg Sýrlands. Uppreisnarmenn og öryggissveitir yfirvalda hafa barist um yfirráð yfir borginni í rúman mánuð en Aleppo er sögð gegna veigamiklu hernaðarlegu hlutverki og gæti ráðið úrslitum um niðurstöðu stjórnarbyltingarinnar í Sýrlandi.

Skýrslan byggir á frásögnum sjónarvotta og starfsmanna Amnesty í Aleppo. Í henni kemur fram að öryggissveitirnar hafi undanfarið beitt þungavopnum og loftárásum í auknu mæli. Þessar árásir séu síðan oft á tíðum handahófskenndar og óútreiknanlegar og geti stefnt lífi óbreyttra borgara í hættu. Samkæmt Amnesty hafa þrjátíu loftárásir á óbreytta borgara átt sér stað á síðustu tíu dögum.

Ekkert lát er á stórskotaárásum öryggissveita á Aleppo og Damaskus, höfuðborg Sýrlands. Uppreisnarmenn halda því fram að rúmlega fjörutíu hafi fallið í borgunum síðasta sólarhringinn.