Liverpool gaf Man. City stig

Martin Skrtel var fyrst hetja og síðan skúrkur er Liverpool tók á móti Man. City. Liverpool komst tvisvar yfir í leiknum en gaf City tvö mörk í 2-2 jafnteflisleik. Seinna markið sem Skrtel gaf var sérstaklega pínlegt.

Liverpool leiddi í hálfleik en Martin Skrtel stangaði hornspyrnu Steven Gerrard af krafti í netið. Virkilega smekklega gert.

Yaya Toure jafnaði leikinn um miðjan síðari hálfleik. Hann nýtti sér þá klaufagang í vörn Liverpool til fullnustu.

Tevez átti sendingu í teiginn sem Pepe Reina ætlaði að kýla frá. Hann keyrði á eigin liðsmann og boltinn flaug yfir á fjærstöng. Þar átti Kelly hrikalega snertingu, boltinn endaði hjá Toure sem skoraði.

Tveim mínútum síðar kom Luis Suarez Liverpool aftur yfir með marki beint úr aukaspyrnu. Hann setti boltann út fyrir varnarvegginn og í nærhornið. Veggurinn greinilega ekki nógu vel uppstilltur hjá Joe Hart.

Liverpool hélt áfram að vera sjálfu sér verst. Tíu mínútum fyrir leikslok átti Skrtel glórulausa sendingu til baka. Hún fór beint á Carlos Tevez sem sólaði Reina og sendi boltann auðveldlega í tómt netið. Skelfileg mistök hjá Skrtel.

Mikill darraðardans var á lokamínútum leiksins er bæði lið freistuðu þess að næla í öll þrjú stigin.