Leyndardómar Curiosity opinberaðir

Verkfræðingar NASA hafa svipt hulunni af leyndardómum vitjeppans Curiosity sem nú dólar sér í auðninni á Mars. Nú hefur komið í ljós að Curiosty fékk vasapening með í för.

Frá því að farið lenti á rauðu plánetunni hafa vísindamenn Geimferðastofnunar Bandaríkjanna haldið nær daglega blaðamannafundi þar sem nýjustu upplýsingar frá Cursioty eru birtar.

En þessar upplýsingar eru ekki alfarið af vísindalegum toga. Nú hefur verið opinberað að verkfræðingar Jet Propulsion Lab (JPL) smiðjunnar stöfuðu nafn hennar í morsstafrófi á dekk Curisioty. Undirskrift verkfræðinganna verður þannig geymd á yfirborði Mars um ókomin ár. Kóðinn er skrifaður svona: .--- .--. .-..

Það er þó ekki aðeins undirskrift JPL sem nú reikar um Mars því nöfn rúmlega milljón geimvísindaáhugamanna eru geymd á sérstökum tölvukubbi í Curiosity.

Vitjeppinn státar einnig af forláta sólúri en hann nota vísindamennirnir til að fylgjast með stöðu sólar á Mars. En á sólúrinu eru einnig margskonar skilaboð. „Til Mars, til að kanna," stendur þar skrifað. Þá er nafn rauðu plánetunnar einnig á skífunni og það á sextán tungumálum.

Þá hefur einnig verið opinberað að lukkupeningur er með í för en hann er fastur á annarri hlið farsins. Hann er notaður til að stilla myndavélar Curiosty.