Luiz verður ekki seldur til Barcelona

Roberto do Matteo, stjóri Chelsea, segir að það komi ekki til greina að selja varnarmanninn David Luiz frá félaginu. Hann sé einfaldlega ekki til sölu.

Sagt var að framtíð hans væri í óvissu en bæði Man. City og Barcelona voru sögð hafa áhuga á honum. City neitaði því.

Er Luiz fór á leik Barcelona og Real Madrid fóru orðrómarnir á mikið flug.

"Luiz er hluti af okkar framtíð. Það er eðlilegt að hann veki athygli enda brasilískur landsliðsmaður. Það hafa engin félög gert tilboð í hann og hann er heldur ekki til sölu. Þetta truflar mig ekki neitt og hann verður hér næstu árin," sagði Di Matteo.

"Ég held að við getum vel staðist áhlaup frá Barcelona í hann. Við finnum ekki fyrir neinni pressu að selja hann. Ég skil heldur ekki af hverju leikmenn ættu að vilja fara enda erum við félag sem keppir alltaf um titla."