Sahin: Mourinho sagði mér að velja Liverpool

Hinn nýi leikmaður Liverpoo, Nuri Sahin, segir að þjálfarinn sinn hjá Real Madrid, Jose Mourinho, hafi hvatt hann til þess að semja við Liverpool frekar en Arsenal.

Liverpool og Arsenal hafa undanfarna daga barist um að fá leikmanninn lánaðan frá Real og úr varð að Sahin samdi við Liverpool.

"Mourinho sagði mér að skemmtilegasta deildin væri enska deildin. Þar myndi ég njóta fótboltans í hverri viku. Hann sagðist líka mæla með Brendan Rodgers eftir að hafa unnið með honum hjá Chelsea. Sagði að Rodgers væri góður þjálfari og toppmaður. Það skiptir mig máli," sagði Sahin.

Er Sahin hafði síðan rætt við Rodgers var hann ekki í vafa um að velja Liverpool.