Stephen Hawking ávarpaði gesti og þátttakendur á Ólympíulmótinu

Það er óhætt að segja að setningarathöfn Ólympíumóts fatlaðra hafi hafist með stórum hvelli, en eðlisfræðingurinn Stephen Hawking ávarpaði gesti í upphafi með sinni vélrænu rödd.

Hawking sagði meðal annars að Ólympíuleikar fatlaðra snérust um að breyta skynjun okkar á heiminum.

Þá steig stórleikarinn Ian KcKellen á svið og lék atriði úr sýningu Shakespeare, Storminum (The Tempest). Keppendur ganga nú inn á völlinn hver á eftir öðrum.

Það var frjálsíþróttamaðurinn Helgi Sveinsson sem bar fána Íslands inn á völlinn. Fulltrúar Íslands í ár eru sundfólkið Jón Margeir Sverrisson og Kolbrún Alda Stefánsdóttir, og frjálsíþróttakonan Matthildur Ylfa Þorsteinsdóttir.

Alls taka fulltrúar frá 166 löndum í heiminum þátt í Ólympíumótinu. Fimmtán þjóðir eru nú með í fyrsta sinn.