Everton og Manchester City komast að samkomulagi um Rodwell

Enski miðjumaðurinn Jack Rodwell virðist vera fyrstu kaup Manchester City þetta sumarið en Everton gaf frá sér yfirlýsingu fyrir stuttu sem staðfesti samkomulag liðanna um kaupverð á honum.

Rodwell sem er 21 ára hefur lengi verið talinn meðal efnilegustu leikmanna Englendinga og steig fyrstu skref sín í ensku úrvalsdeildinni árið 2008. Sífelld meiðsli hafa gert það að verkum að hann hefur ekki spilað 100 leik i fyrir liðið á þessum tíma.

Lengi var talað um að Alex Ferguson væri að fylgjast með Rodwell en nú virðist andstæðingur hans, Roberto Mancini vera að tryggja sér þjónustu Rodwells. Þetta verða fyrstu stóru kaup Manchester City á þessu tímabili en Roberto Mancini gagnrýndi stefnu félagsins í vikunni að hann hefði ekki möguleika á að styrkja leikmannahópinn.

Rodwell átti tvö ár eftir af samningi sínum við Everton og hafði spilað mikið á undirbúningstímabilinu og voru miklar vonir bundnar við hann. Hinsvegar hafa Everton aldrei farið leynt með fjárhagsstöðu félagsins og neyðast til að selja enn eina af stjörnum félagsins til stærra liðs.

Manchester City spilar fyrsta leik sinn á tímabilinu 12:30 í leiknum um góðgerðarskjöldin og verður hann í beinni útsendingu á Stöð 2 Sport.