Framtíð Modric ræðst þegar Tottenham-liðið kemur aftur til Englands

Gylfi Þór Sigurðsson og félagar í Tottenham enduðu æfingaferð sína til Bandaríkjanna með 2-1 sigri á New York Red Bulls í nótt. Gylfi Þór skoraði glæsilegt sigurmark og lagði einnig upp fyrra markið en góð frammistaða Íslendingsins dugði þó ekki til að fá enska fjölmiðla til að hætta að spyrja Andre Villas-Boas um Króatann Luka Modric.

Real Madrid og Tottenham eru að ræða saman en forráðamenn Spurs vilja fá 40 milljónir punda fyrir leikmanninn og hafa ekki viljað fá menn eins og Ricardo Carvalho eða Nuri Sahin í kaupbæti.

„Luka æfir nú sjálfur tvisvar á dag. Við munum gefa hinum leikmönnunum frí þegar við komum aftur til London og þá munum við ákveða hvað er best í stöðunni fyrir Luca," sagði Andre Villas-Boas við Sky Sports.

„Hann er ennþá leikmaður Tottenham en verður að vera í réttu hugarástandi til að fara æfa aftur með liðsfélögunum sínum. Hann er skrefinu á eftir og við þurfum að búa til prógram til að koma honum í almennilegt form," sagði Villas-Boas.

Luka Modric neitaði að fara með Tottenham til Bandaríkjanna og var sektaður fyrir það. Frammistaða Gylfa í Bandaríkjaferðinni (1 mark + 2 stoðsendingar í 3 leikjum) ætti þó að róa þá stuðningsmenn Spurs sem hafa áhyggjur af því að missa Króatann.