Kúveitarnir losa sig við Cotterill

Al-Hasawi fjölskyldan, sem nýlega gekk frá kaupum á enska knattspyrnufélaginu Nottingham Forest, hefur vikið Steve Cotterill úr stöðu knattspyrnustjóra félagsins.

Fjölskyldan, sem keypti ráðandi hlut í félaginu á dögunum, ætlar greinilega að láta til sín taka en Cotterill skrifaði undir þriggja og hálfs árs samning í október síðastliðnum.

Undir stjórn Cotterill hafnaði félagið í 19. sæti Championship-deildarinnar á síðustu leiktíð. Liðið fór skelfilega af stað á leiktíðinni áður en Cotterill var fenginn til liðsins.

„Félagið lýsir yfir miklu þakklæti til Hr. Cotterill fyrir að koma félaginu í gegnum erfiða tíma og halda sæti þess í Championship-deildinni á síðustu leiktíð."

Nottingham Forest státar af því einstaka afreki að hafa unnið sigur í Evrópukeppni Meistaraliða (nú Meistaradeild Evrópu) oftar en félagið varð landsmeistari. Forest varð enskur meistari vorið 1978 og Evrópumeistari árið 1979 og 1980.