Berbatov vill fá svör um framtíð sína hjá Man Utd

Dimitar Berbatov er ekki sáttur við stöðu sína hjá enska úrvalsdeildarliðinu Manchester United og hann vill komast frá liðinu. Hinn 31 árs gamli framherji frá Búlgaríu var í algjöru aukahlutverki hjá Man United á síðustu leiktíð og hann segir í færslu á fésbókarsíðu sinni að það væri best fyrir alla aðila ef hann færi frá félaginu.

Berbatov skrifa m.a. að hann sé þreyttur á þeirri óvissu sem ríki um framtíð hans og þá sérstaklega þeim verðmiða sem Man Utd hefur sett á hann. „Ég les að félagið vilji fá 10 milljónir punda fyrir mig, knattspyrnustjórinn segir að þeir vilji fá 5 milljónir punda. Ég elska þetta félag, en ég nýtist ekki félaginu ef ég fæ ekki að spila, ég vil hjálpa liðinu," skrifaði Berbatov m.a. á fésbókina.

Hann hefur skorað 48 deildarmörk fyrir Man Utd í 100 leikjum frá því hann var keyptur fyrir 30 milljónir punda frá Tottenham árið 2008. Berbatov skoraði 7 mörk í aðeins 12 leikjum á síðustu leiktíð.