West Ham vill fá Dimitar Berbatov

Forráðamenn nýliða West Ham hafa áhuga á því að klófesta búlgarska sóknarmanninn Dimitar Berbatov og styrkja þar með liðið fyrir átökin í ensku úrvalsdeildinni. West Ham hafði áður sýnt því áhuga á að fá Andy Carroll framherja Liverpool í sínar raðir en framtíð hans hjá Liverpool virðist vera afar óljós.

Hinn 31 árs gamli Berbatov er enn samningsbundinn Manchester United en hann virðist ekki vera í framtíðarplönum Sir Alex Ferguson knattspynustjóra liðsins. Samkvæmt fréttum enskra fjölmiðla vilja stjórnendur Man Utd fá allt að 5 milljónir punda fyrir leikmanninn eða sem nemur um einum milljarði ísl. kr. West Ham hefur einnig sýnt því áhuga á að fá Berbatov að láni frá Man Utd út næstu leiktíð.

Það eru fjögur ár síðan Berbatov var seldur fyrir 30 milljónir punda eða sem nemur 8 milljörðum ísl. kr. en hann var á þeim tíma í herbúðum Tottenham í London. Berbatov skoraði 14 mörk á sínu fyrsta tímabili í Manchester, hann skoraði 12 á næsta tímabili og 20 mörk á því þriðja þar sem hann deildi markakóngstitlinum með fyrrum liðsfélaga sínum Carlos Tevez – sem skoraði 20 mörk fyrir Manchester City.